NATO-ya yenicə qoşulan İsveç 2025-ci ildə alyansın əməliyyatları üçün Latviyaya 600 əsgər, səkkiz “Jas Gripen” döyüş təyyarəsi və bir döyüş gəmisi göndərməyi planlaşdırır.
AZƏRTAC xəbər verir ki, hökumətin təqdim etdiyi İsveçin 2025-ci ildə müdafiə və NATO-nun qarşısının alınmasına töhfəsi haqqında qanun layihəsinin bu ilin sonunda Riksdaq (İsveç Parlamenti) tərəfindən təsdiqlənməsi gözlənilir.
"Bu tarixi qərar İsveç silahlı qüvvələrinin ilk dəfə NATO missiyalarına cəlb olunacağı ilk hadisədir", - deyə xarici işlər naziri Mariya Malmer Stenerqard bildirib.
Hazırda İsveçin Skone şəhərində P7 alayında təlim keçən batalyon bölgədə yerləşdirilən İrəli Quru Qoşunlarının (Forward Land Forces, FLF) bir hissəsi olacaq. Təhlükəsizlik vəziyyəti pisləşərsə, şəxsi heyətin sayı 1200 nəfərə qədər artırıla bilər.
Bundan əlavə, İsveç Baltik və ya Şimal dənizində patrul və minaların təmizlənməsi üçün bir hərbi gəmi, həmçinin hava patrul xidməti üçün ən azı səkkiz “Jas Gripen” qırıcısı verəcək. Lakin onların dəqiq yerləşdirilmə mövqeyi hələ müəyyən edilməyib.
İsveç həmçinin Baltik hava məkanına nəzarət üçün NATO-nun “Baltic Air Policing” missiyasında iştirak imkanını nəzərdən keçirir. Ölkə 2026-2027-ci illərdə isə təhlükəsizliyini gücləndirmək məqsədilə Finlandiya ilə əməkdaşlığı genişləndirməyi planlaşdırır.
Hökumət Britaniyanın rəhbərlik etdiyi Birgə Ekspedisiya Qüvvəsi (Joint Expeditionary Force, JEF) və ABŞ-ın başçılıq etdiyi Bombardmançı Aviasiya Qrupu (Bomber Task Force) kimi əməliyyat tapşırıqlarını yerinə yetirmək məqsədilə digər döyüş qüvvələrinə qoşun göndərə bilmək üçün parlamentdən mandat əldə etmək istəyir.
