Lavrov: "Əgər İrəvan Bakı ilə birbaşa danışmaq istəyirsə, lap yaxşı"

Rusiya Xarici İşlər naziri Sergey Lavrov Ermənistanın Rusiyanın iştirakı olmadan Azərbaycanla birbaşa danışıqlar aparmaq istəyinə şərh verib.

Oxu.Az TASS-a istinadən verdiyi məlumata görə, Rusiya Federasiyasının Xarici İşlər Nazirliyinin Moskva Dövlət Beynəlxalq Münasibətlər İnstitutunun müəllim və tələbələri qarşısında çıxış edən Rusiya diplomatiyasının rəhbəri bildirib ki, Rusiya 2020-2022-ci illərdə Rusiya, Azərbaycan və Ermənistan arasında bir neçə sammitdə əldə edilmiş üçtərəfli razılaşmaların da zəiflədiyindən narahatdır.

"Mən nəqliyyat əlaqələrinin bərpasını və bununla məşğul olan üçtərəfli komissiyanı xatırlatdım, o, indi demək olar ki, artıq toplanmır. İrəvan hesab edir ki, bunu Azərbaycanla birbaşa etmək lazımdır, amma əgər onlarda alınırsa, lap yaxşı", - deyə Lavrov bildirib.

Onun sözlərinə görə, dövlət sərhədinin delimitasiyası məsələsində Rusiya bu prosesdə iştirakçılara məsləhət verə bilərdi, lakin bu baş vermir.

"Yox, istəmirlər və eyni zamanda daim Qərbi, Amerika Birləşmiş Ştatlarını, Avropa İttifaqını, Parisi hər hansı proseslərə öz himayəsini verməyə cəlb etməyə çalışırlar. Bu onların seçimidir, amma ilk növbədə azərbaycanlı qonşularla razılaşmaq lazımdır. Başqa yol yoxdur", - deyə Rusiya XİN rəhbəri əlavə edib.

Daha əvvəl Ermənistanın baş naziri Nikol Paşinyan bəyan edib ki, Azərbaycanla birbaşa danışıqlar müsbət nəticələr verir.