Danimarka 2021 və 2022-ci illərdə baş verən hərbi çevrilişləri əsas gətirərək, Mali və Burkina Fasodakı səfirliklərini bağladığını açıqlayıb. Bu siyasi dəyişikliklər Danimarkanın Sahel bölgəsində fəaliyyət imkanlarını xeyli məhdudlaşdırıb.

AZƏRTAC xəbər verir ki, Danimarka Xarici İşlər Nazirliyi avqustun 26-da Mali və Burkina Fasodakı səfirliklərinin bağlandığını elan edərək, bu qərarı həmin Afrika ölkələrində hakimiyyətdə olan hökumətləri tanımaqdan imtina etməklə əsaslandırıb. Danimarkanın Afrikadakı yeni strategiyasının bir hissəsi olaraq, səfirliklərin Seneqal, Ruanda və Tunisdə yeni nümayəndəliklərlə əvəz olunacağı bildirilir.

Danimarkanın xarici işlər naziri qeyd edib ki, yeni strukturlaşma Çin və Rusiyanın Afrika qitəsində artan təsirinin qarşısını almaq məqsədi daşıyır. Danimarka, həmçinin Misir, Keniya, Cənubi Afrika, Nigeriya və Qanadakı diplomatik heyətini artırmağı planlaşdırır. Eyni zamanda, su və iqlim dəyişikliyi sahələrində Afrikaya dəstək sərmayələri yatıracaq.

Kopenhagenin qərarına cavab olaraq, AESinfo-dan Abubakar Uedraqo qeyd edib ki, Danimarka selektiv seçimi ilə suveren xalqların öz müqəddəratını təyinetmə hüququnu görməzdən gəlir. Onun sözlərinə görə, Mali və Burkina Faso onların siyasi xətlərinə hörmət etməyən tərəfdaşların təsiri altına düşmədən sabitliyə doğru yollarını davam etdirəcək.