Almaniyanın ola biləcək müharibəyə hazır olması üçün uzun illər lazım olduğunu bildirən araşdırmada müdafiə xərclərinin kifayət qədər olmadığı və Rusiyanın hərbi gücünün sürətlə artdığı vurğulanıb.
IfW: Bundesver müharibəyə hazır deyil
Almaniyada aparılan araşdırmaya görə, ölkə mümkün müharibəyə yalnız uzun illərdən sonra hazır olacaq. Kiel Dünya İqtisadiyyatı İnstitutunun (İfW) hazırladığı “Avropa və Almaniyanın Rusiyaya qarşı yavaş silahlanması” başlıqlı hesabatda Alman ordusu Bundesverin döyüş hazırlıqlarının çox ləng getdiyi bildirilib.
Hesabatda Almaniyanın Rusiya təhlükəsinə qarşı silahlanmada xeyli geridə qaldığı və iki ölkənin hərbi potensialı arasında uçurumun getdikcə artdığı vurğulanıb. Koalisiya hökumətinin müdafiə xərclərinin yetərli olmadığı və satınalma nisbətinin çox aşağı olduğu bildirilib. Qeyd olunub ki, bu şərtlər altında Almaniyanın 20 il əvvəlki hərbi ehtiyat səviyyəsinə çatması üçün təxminən 100 il lazım olacaq.
Mövcud təchizat nisbətinə görə, Alman ordusunun 2004-cü ildə döyüş təyyarəsi ehtiyatlarına çatması üçün 15 il, tank ehtiyatları üçün 40 il və artilleriya haubitsa ehtiyatları üçün təxminən 100 il lazım olacağı təxmin edilir. Digər tərəfdən, Rusiyanın hərbi istehsal gücünü böyük ölçüdə artırdığı və Almaniyanın hazırkı ehtiyatını 6 aydan bir az çox müddətə istehsal edə bildiyi bildirilir. Rusiya uzun mənzilli hava hücumundan müdafiə sistemlərinin, tankların və pilotsuz uçuş aparatlarının istehsalını xeyli artıraraq, döyüş sistemlərində irəliləyiş əldə edib. O, həmçinin müdafiəsi çətin olan səsdən sürətli raketlərlə NATO-nun təhlükəsizliyinə ciddi təhlükə yaradır.
Araşdırma qrupunun rəhbəri Quntram Volf bəyan edib ki, Rusiya NATO üçün artan təhlükədir və Almaniya müdafiə sahəsində lazımi silahlanmanı çox yavaş həyata keçirir. Avropanın təcili olaraq müdafiə xərclərini artırmalı olduğunu vurğulayan Volf, Rusiyanın təcavüzü qarşısında fəaliyyətsiz qalmağın səhlənkarlıq olacağını bildirib.
Kiel Dünya İqtisadiyyatı İnstitutunun prezidenti Moritz Şularik də hökumətin müdafiə siyasətinin boş sözlər olduğunu ifadə edərək, Almaniyanın ildə ən az 100 milyard avro müdafiə büdcəsi olması lazım olduğunu vurğulayıb.
Almaniyanın Ukraynaya silah göndərməsi nəticəsində onun ehtiyatlarında ciddi azalma müşahidə olunur.
Kiel Dünya İqtisadiyyatı İnstitutunun dərc etdiyi yeni hesabata görə, Almaniyanın tanklarının sayı 2400-dən 339-a enib.
Almaniyada cəmi 12 hava hücumundan müdafiə sistemi qalıb.
