Avropanın faşist liderləri Matteo Salvinini dəstəkləmək üçün İtaliyada bir araya gələrək immiqrasiya siyasətləri ilə bağlı sərt mesajlar verdilər.

Matteo Salvininin İtaliyada keçirilən mitinqində Macarıstanın baş naziri Viktor Orban, Hollandiya Azadlıq Partiyasının lideri Geert Vilders, Portuqaliya Chega Partiyasının lideri Andre Ventura və İspaniyadan olan Vox sözçüsü Xose Antonio Fuster bir araya gəlib. Qaçqın gəmisinin İtaliyaya yanaşmasına icazə vermədiyinə görə 6 il həbs cəzası ilə mühakimə olunan Liqa Partiyasının lideri və baş nazir müavini Matteo Salvinini dəstəkləyən liderlər Liqa Partiyasının Pontida şəhərində keçirilən ənənəvi mitinqinə qatılıb.

AA xəbərinə görə, Salvininin aparıcılığı ilə keçirilən tədbirə Orban, Vilders, Ventura və Fuster qatılıb. Salvini mitinqdəki çıxışında sərhədləri qorumaq vəzifəsini yerinə yetirdiyi üçün mühakimə olunduğunu söyləyərək, "Başımı dik tuturam. Sərhədləri müdafiə edəni mühakimə edə bilərlər, amma bütün xalqı mühakimə edə bilməzlər. Bu gün , burada, Pontidada Avropa xalqlarının müqəddəs birliyi yaranır, mən bu mübarizədən əl çəkməyəcəyəm”.

Orban: Mühacirləri AB ofislərinin qarşısına aparacağıq
Mitinqin ən diqqət çəkən adı isə Macarıstanın baş naziri Orban olub. Orban, Salvininin İtaliya sərhədlərini qorumaq üçün göstərdiyi səyləri tərifləyərək, "Biz Salvinini Macarıstanda bir qəhrəman kimi görürük. O, sərhədləri bağlayaraq italyanları müdafiə etdi" dedi. Orban qeyri-qanuni miqrasiya davam edərsə, immiqrantları Budapeştdən Brüsselə aparıb AB ofislərinin qarşısına yerləşdirəcəklərini bildirib. "Əgər immiqrant istəyirlərsə, saxlasınlar. Macarıstanda mühacirlərin sayı sıfıra bərabərdir. Biz qeyri-qanuni mühacirlərə icazə vermirik".

Portuqaliyanın ifrat sağçı lideri Ventura isə İtaliyanı qorumaq üçün göstərdiyi səylərə görə Salvininin təqiblərə məruz qaldığını müdafiə edərək, "Salvinini müdafiə etməliyik. Onun kimi Avropada daha çox liderə ehtiyacımız var" dedi.