“Prezident İlham Əliyevin Daşkəndə dövlət səfəri çərçivəsində imzalanmış Azərbaycan ilə Özbəkistan arasında Müttəfiqlik Münasibətləri haqqında Müqavilə bütün türk dünyası ölkələri üçün uğurlu qarşılıqlı fəaliyyətin bariz nümunəsidir”.

Bu fikri AZƏRTAC-a müsahibəsində Türkiyənin Azərbaycandakı keçmiş səfiri, “İMZA” Sosial İnkişafa Dəstək İctimai Birliyinin Türkiyədəki nümayəndəsi Hulusi Kılıç söyləyib.

O qeyd edib ki, Azərbaycan-Özbəkistan razılaşmaları əməkdaşlığın geniş spektrinin inkişafına yönəlib və eyni zamanda Ermənistanın işğalından azad edilmiş Xankəndi şəhərində Özbəkistan tərəfindən tekstil müəssisəsinin açılmasını nəzərdə tutur. “Bu, Daşkəndin təkcə investisiya addımı deyil, həm də siyasi mesajdır. Beləliklə, Özbəkistan Xankəndinə sərmayə qoymağa hazır olduğunu bildirən ilk ölkə oldu”, - deyə ekspert bildirib.

Kılıç xatırladıb ki, Özbəkistan Ermənistanda diplomatik nümayəndəlik açılmasını zəruri hesab etməyən dövlətlər sırasındadır.

“Bakı ilə Daşkənd arasında əməkdaşlığın əsasları Ümummilli Lider Heydər Əliyev tərəfindən qoyulub, Prezident İlham Əliyevin düşünülmüş siyasəti və Şavkat Mirziyoyevin müdrik kursu sayəsində güclü təkan alıb”, - deyə ekspert bildirib.

İMZA ictimai birliyinin nümayəndəsi Azərbaycan liderinin Daşkəndə səfərinin nəticələrini “tarixi” adlandırıb və diqqəti Azərbaycan və Özbəkistan liderləri tərəfindən müəyyən edilmiş 20 yeni qarşılıqlı fəaliyyət istiqamətinə yönəldib.

Kılıç Azərbaycan-Özbəkistan əlaqələrinin Türk Dövlətləri Təşkilatı üçün əməkdaşlıq modeli olduğunu vurğulayıb.

“Prezident İlham Əliyevin Özbəkistana səfəri Azərbaycanın həm Qərblə, Rusiya Federasiyası ilə əlaqələrin qurulmasında, həm də türk dövlətləri ilə qarşılıqlı fəaliyyətdə özünü göstərən uğurlu və güclü çoxvektorlu xarici siyasətinin növbəti təzahürü oldu. Azərbaycan regionda parlaq ulduzdur, bu da BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası - COP29-da bir daha dünyaya nümayiş etdiriləcək”, - deyə keçmiş səfir vurğulayıb.