Almaniyanın Federal Kansleri Olaf Şoltsun Qazaxıstana gözlənilən səfəri ikitərəfli münasibətləri yeni səviyyəyə qaldıracaq.
AZƏRTAC-ın məlumatına görə, bu barədə Qazaxıstan xarici işlər nazirinin müavini Alibek Kuantırov Berlində keçirilən Strateji Əməkdaşlıq üzrə Qazaxıstan-Almaniya İşgüzar Şurasının növbəti iclasında bildirib.
"Almaniya Avropa İttifaqında Qazaxıstanın əsas ticarət tərəfdaşıdır. Biz iki ölkənin biznes dairələri arasında əməkdaşlığı daha da gücləndirməliyik", - deyə A.Kuantırov vurğulayıb.
İclasda həmçinin qeyd olunub ki, Transxəzər Beynəlxalq Nəqliyyat Marşrutu (TBNM) vasitəsilə Almaniya və Avropa İttifaqı ölkələrinə yük axını 2022-ci ilin əvvəlindən təxminən üç dəfə artaraq 1,5 milyon tona, bu ilin yeddi ayında isə 2,6 milyon tona çatıb. Eyni zamanda, TMTM-nin potensialı 10 milyon ton yük olaraq qiymətləndirilir. Bu baxımdan Qazaxıstan tərəfi alman tərəfdaşlarını Aktau və Kurık Xəzər dənizi limanlarının inkişafında fəal iştirak etməyə dəvət edib.
