Avqustun 30-da STEM Analitik Mərkəzində “Cənubi Qafqazda siyasi proseslər və Azərbaycan-Gürcüstan münasibətlərinin bu proseslərdə rolu” mövzusunda dəyirmi masa olub.

AZƏRTAC xəbər verir ki, tədbirdə təqdimatla çıxış edən milli təhlükəsizlik məsələləri üzrə tanınmış gürcü eksperti, siyasi və hərbi elmlər doktoru, Qafqaz Beynəlxalq Universitetinin professoru Vaxtanq Maisaya Cənubi Qafqaz regionunda gedən siyasi proseslər və bu proseslərdə Azərbaycan-Gürcüstan münasibətlərinin rolundan danışıb.

Gürcü ekspert deyib: “Hazırda regionda transformasiya prosesi gedir. Ermənistan-Azərbaycan münaqişəsinin həlli və Azərbaycan Respublikasının ərazilərinin işğaldan azad edilməsi regionda geosiyasi vəziyyəti dəyişib, əməkdaşlığın inkişafı üçün yeni imkanlar açıb.

Regiondakı yeni geosiyasi vəziyyəti iki amil ilə xarakterizə etmək olar; birinci amil Azərbaycanın öz ərazilərini azad etməsidir; ikinci amil isə iqtisadi imkanlarla bağlıdır ki, bu da əsasən regional nəqliyyat dəhlizlərinin açılmasına aiddir. Gürcüstan Azərbaycan üçün dost və qonşu ölkədir, onunla bir çox enerji, logistika və nəqliyyat layihələri həyata keçirir. Gürcüstanda oktyabrda, Azərbaycanda isə iki gündən sonra Milli Məclisə seçkilər keçiriləcək”.

2009-cu ildən doğulduğu Bakıya səfər etmədiyini diqqətə çatdıran gürcü ekspert vurğulayıb: “Burada yalnız mənim ilk dostlarım deyil, həm də qardaşlarım olub. Ərazi bütövlüyünün bərpası münasibətilə Azərbaycan xalqını şəxsən təbrik etmək istərdim. Mən çox arzulayıram ki, Gürcüstan da belə bir qələbə qazansın”.

Tədbir çərçivəsində STEM Analitik Mərkəzi ilə Qafqaz Beynəlxalq Universiteti arasında Anlaşma Memorandumu imzalanıb. Sənəddə tərəflər arasında əməkdaşlıq, əlaqələrin inkişafı və möhkəmləndirilməsi nəzərdə tutulur.