Artıq dünəndən etibarən ölkəmizdə Aİ-92 markalı avtomobil benzininin satış qiyməti 1 litr üçün 1 manat, dizel yanacağının satış qiyməti isə 1 litr üçün 80 qəpik müəyyən edilib.
İqtisadi məsələlər üzrə ekspert Samir Əliyev hesab edir ki, benzin və dizelin qiymətindəki artım hələ son deyil.
O, bu ilin sonu və ya növbəti il ərzində də 92 markalı benzin və dizelin qiymətinin qalxmasını proqnozlaşdırır.
Samir Əliyev deyib ki, Tarif Şurası yanacağın keyfiyyətinin artırılmasını əsas gətirərək qiymət artımını həyata keçirib. Amma bu artan qiymət hələ ki, gələcəkdə istehsal olunacaq daha yüksək keyfiyyətli yanacağın istehsalına uyğun qiymət deyil. Ona görə də, 2022-ci ildə yüksək keyfiyyətli yanacaq istehsal edən zavod fəaliyyətə başlayana kimi qiymətin yenidən artması gözləniləndir.
Mütəxəssis hesab edir ki, Aİ-92 markalı benzinin və dizel yanacağının bahalaşması kənd təsərrüfatı məhsullarının, taksi xidmətinin, daşınma xidmətinin də qiymətlərində bahalaşma ilə müşayət olunacaq. Ancaq qeyri-ərzaq məhsullarında qiymət artımı gözlənilmir.
Mənbə: BBC
