Avropanın yeraltı qaz anbarlarında toplanmış mavi yanacaq ehtiyatlarının həcmi 93,72 faizə çatıb, lakin 2019-cu ilin rekord göstəricisindən (95,7 faiz) geri qalır.

AZƏRTAC xəbər verir ki, Gas Infrastructure Europe assosiasiyasının məlumatına görə, sentyabr ayında Avropa İttifaqı ölkələrində anbarlarına qaz doldurulması kəskin azalaraq 2011-ci ilin minimumuna enib. Sentyabrın 22-də anbarlara qaz doldurulması 149 milyon kubmetr, qaz götürülməsi isə 48 milyon kubmetr təşkil edib.

Hazırda Avropanın yeraltı anbarlarında 103,86 milyard kubmetr (93,72 faiz) qaz var ki, bu da son beş ilin analoji dövrünün orta göstəricisindən 4,96 faiz çoxdur.

Bu həftə Mərkəzi və Qərbi Avropada havanın öncəki yeddi günlə müqayisədə bir qədər sərin keçəcəyi proqnozlaşdırılır. Sentyabr ayında Avropanın elektrik enerjisi istehsalında külək generasiyasının payı 16 faizədək artıb.

Avqust ayında terminallardan Avropanın qazötürmə sisteminə maye qaz vurulması 2021-ci ilin oktyabrından bəri ən aşağı səviyyəyə ensə də, sentyabrda yenidən artmağa başlayıb. Hazırda Avropanın qaz kəmərlərinə maye qazın vurulması maksimum gücün 33 faizinə bərabərdir.

London ICE birjasında min kubmetr qazın qiyməti təxminən 420 dollardır.