Zəngəzur dəhlizi Avropa, Mərkəzi Asiya və Çin arasında ən qısa və təhlükəsiz tranzit marşrut rolu oynayacaq.
"Report" xəbər verir, bunu rəqəmsal inkişaf və nəqliyyat nazirinin müavini Rəhman Hümmətov Bakı İqlim Fəaliyyəti Həftəsinin 2-ci günündə təşkil edilmiş "Sıfır emissiyalı dəniz, yük logistikası və nəqliyyat" növzusunda dəyirmi masada bildirib.
O qeyd edib ki, nəqliyyat sektorunun "yaşıl transformasiya"sına ekoloji təmiz nəqliyyat vasitələrinin daha çox istifadəsi, davamlı ictimai nəqliyyat proqramlarının qəbulu, zəruri infrastrukturun qurulması və sərnişinlər üçün davamlı səyahət alternativlərinin artırılması ilə nail olmaq mümkündür: "Azərbaycan strateji infrastruktura sərmayə qoymaqla yerləşdiyi nəqliyyat marşrutlarının transformasiyasında mühüm addımlar atır. Azərbaycan rəhbərliyi ölkənin ərazi bütövlüyünü bərpa etdikdən sonra Zəngəzur dəhlizinin açılması ilə Avrasiya logistikasında əsas oyunçuya çevrilmək öhdəliyimizi daha da gücləndirir. Azərbaycan ərazisindən keçən tranzit yüklərin həcmi 2019-2023-cü illərdə 5,7 milyon tondan 13,4 milyon tona yüksəlib. Azərbaycan tərəfdaşları ilə birlikdə Orta Dəhliz boyu "yaşıl transformasiya" təşəbbüslərinə sadiqdir".
