dpa: Ankara Eurofighter üçün Berlindən dəstək gözləyir
Almaniyanın dpa xəbər agentliyinin türk dairələrindən əldə etdiyi məlumata görə, Ankara Eurofighter qırıcı təyyarələrinin alınması ilə bağlı Berlindən “müsbət siqnallar” gözləyir.
Türkiyə hökuməti Eurofighter Typhoon döyüş təyyarələrinin alınmasında irəliləyiş əldə etmək üçün səy göstərir. Almaniyanın dpa xəbər agentliyi məsələdən xəbərdar olan Türkiyə rəsmilərinə istinadən yazıb ki, Ankara Eurofighter qırıcı təyyarələrinin alınması ilə bağlı Berlindən “müsbət siqnallar” gözləyir.
Silah ixracından məsul olan Almaniya İqtisadiyyat Nazirliyi dpa-nın mövzu ilə bağlı sualına "Almaniya hökuməti prinsipcə davam edən prosesləri şərh etmir" deyə cavab verib.
Türkiyə hökuməti Almaniya, İngiltərə, İtaliya və İspaniya konsorsiumu tərəfindən istehsal olunan 40 Eurofighter döyüş təyyarəsi almağa çalışır.
Almaniya da Eurofighters istehsalı ilə məşğul olduğundan, hər bir ixrac əməliyyatı üçün Almaniya hökumətindən icazə tələb olunur.
Türkiyə keçən ildən bəri Almaniyanın Eurofighter satışına “hə” deməsinə çalışır.
Milli Müdafiə naziri Yaşar Gülər əvvəlki açıqlamasında Türkiyənin İngiltərə və İspaniyanın razılığını aldığını bildirib.
Həftə sonu Der Spiegel jurnalında dərc olunan xəbərdə Almaniya hökumətinin Türkiyəyə silah ixracı ilə bağlı siyasətində bəzi dəyişikliklər etdiyi iddia edilib.
Məlumata görə, Almaniya hökuməti Türkiyə donanması üçün 100 zenit-raket və torpedalar, həmçinin Türkiyə sualtı qayıqları və freqatlarının modernləşdirilməsi üçün material paketləri də daxil olmaqla “bir neçə yüz milyon avro dəyərində silah ixracını təsdiqləyib. Lakin Almaniya İqtisadiyyat Nazirliyi dpa-nın bu məsələ ilə bağlı təsdiq tələbinə cavab verməyib.
Almaniya hökuməti 2016-cı ildə çevriliş cəhdinə qədər Türkiyəyə irimiqyaslı silah ixracına icazə verib. Lakin çevriliş cəhdindən və türk hərbçilərinin Suriyaya yerləşdirilməsindən sonra Türkiyəyə silah ixracı əhəmiyyətli dərəcədə məhdudlaşdırılıb. Son illərdə birrəqəmli milyonluq diapazonda qaldı. 2023-cü ilin dekabr ayının əvvəlinə qədər Türkiyəyə silah satışı üçün cəmi bir milyon 220 min avro dəyərində 17 müraciət edilib.
