İsrail hərbçiləri Qəzza zolağında Fələstinin HƏMAS hərəkatının Siyasi Bürosunun üzvlərindən biri İzzəddin Qəssabı məhv ediblər.

Bu barədə İsrail ordusunun mətbuat xidməti məlumat yayıb.

Məlumata görə, o, anklavın cənubunda Xan-Yunis şəhəri yaxınlığında kəşfiyyat məlumatları əsasında İsrail HHQ-nin dəqiq zərbəsi nəticəsində məhv edilib.

“Qəssab Qəzza zolağında sağ qalan HƏMAS-ın yüksək rütbəli Siyasi Büro üzvlərindən biri idi. Onunla birlikdə köməkçisi, döyüşçü Ayman Ayeş də məhv edilib”, – bəyanatda deyilir.

İsrail ordusu bildirir ki, Qəssab yəhudi dövlətinə qarşı terror aktlarının təşkilində iştirak edib. O, “əhəmiyyətli hakimiyyətə malik idi” və “HƏMAS-ın Qəzza zolağındakı digər fələstin fraksiyaları ilə strateji və hərbi əlaqələrinin saxlanması” ilə məşğul olub.