Birləşmiş Ştatlar İndoneziya ilə geniş miqyaslı strateji tərəfdaşlığını, o cümlədən təhlükəsizlik sahəsində əməkdaşlığı dərinləşdirmək niyyətindədir.

Bu barədə ABŞ Prezidenti Cozef Bayden, Ağ Evdə indoneziyalı həmkarı Prabovo Subianto ilə görüşündə bildirib.

Amerika lideri qeyd edib ki, bu il Vaşinqton və Cakarta arasında diplomatik əlaqələrin qurulmasının 75 illiyi qeyd olunur.

"Fəxr edirəm ki, ölkələrimiz arasında tərəfdaşlıq həmişəkindən daha güclüdür. Bu gün tərəfdaşlığı necə gücləndirəcəyimizi müzakirə edəcəyik. Hər şeydən əvvəl, mənim fikrimcə, ASEAN-la mərkəzi rol oynayan Hindistan və Sakit okeanların azad və açıq bölgələrini...", - Bayden deyib. Onun sözlərinə görə, ABŞ "təhlükəsizlik sahəsində əməkdaşlığı əhatə edən hərtərəfli strateji tərəfdaşlığı dərinləşdirməyə" yönəlib.

Bundan əlavə, ABŞ Prezidenti İndoneziyanın təmiz enerji keçidi və iqlim dəyişikliyi ilə mübarizədə, həmçinin təhlükəsiz və davamlı tədarük zəncirlərinin qurulmasında olduqca əhəmiyyətli oyunçu olduğunu qeyd edib.

Öz növbəsində, Prabovo Subianto ABŞ-ni İndoneziyanın böyük dostu adlandırıb. "Birləşmiş Ştatlar müstəqilliyimiz uğrunda mübarizəmizdə bizə dəstək olub və çox çətin anlarda kömək edib. Buna görə də İndoneziya ilə ABŞ arasındakı əlaqələri gücləndirmək üçün yorulmadan çalışacağam", - oktyabrın 20-də Prezident vəzifəsinin icrasına başlayan Subianto bildirib.