Artıq bir neçə gün idi ki, Bərdə şəhərində gözlədilən humanitar yüklə dolu yük maşını bu gün səhər saatlarında Xankəndi şəhərinə getmək üçün, Xocavənd rayonu istiqamətində yola düşüb. Bununla da, Azərbaycanın təklif etdiyi, Ağdam-Xankəndi yolu aktiv fəaliyyətə başlamış oldu. Bununla da, Qarabağda yaşayan ermənilərə humanitar yardım etmək istəyənlər, Ağdam-Xankəndi yolundan istifadə edə biləcəklər. Bu səhər baş verən bu əlamətdar hadisə, həmçinin ermənilərin Qarabağda humanitar böhran səhnəciyi yaratmaq cəhdlərinin də qarşısını birdəfəlik alacaq.
Qeyd etmək lazımdır ki, Rusiya hökumətinin təşəbbüsü ilə Azərbaycan Qızıl Aypara Cəmiyyəti və Rusiya Qızıl Xaç Cəmiyyətinin birgə əməkdaşlıq memorandumuna əsasən, Rusiya tərəfindən Azərbaycanın Qarabağ iqtisadi rayonunda yaşayan erməni sakinlərinin ərzağa olan ehtiyaclarının qarşılanması məqsədilə Rusiya Qızıl Xaç Cəmiyyəti tərəfindən ərzaq və qeyri-ərzaq məhsulları olan yükün Ağdam-Əsgəran yolu vasitəsilə Xankəndi şəhərinə çatdırılması üçün sentyabrın 9-da, saat 14:30 radələrində Rusiyadan gələn yük maşını Samur buraxılış məntəqəsindən Azərbaycan ərazisinə keçib.
