Ermənistanı Rusiya ilə birləşdirən yeganə quru yolu olan Lars keçid məntəqəsi bağlanıb. Bağlanmaya səbəb kimi  rəsmi olaraq əlverişsiz hava şəraiti göstərilib. Rusiyaya mal daşıyacaq olan təxminən 2680 yük maşını Gürcüstan tərəfdə gözləməkdə davam edir. 

Sərhədin bağlanmasının arxasında siyasi motivlərin dayandığını iddia edənlər də var. İddialara görə, son zamanlar  Rusiya və Ermənistan arasındakı siyasi gərginlik fonunda, Rusiya öz bazarını erməni biznesmenlərə bağlamaqla Ermənistan üzərində təzyiq yaratmağa çalışır. 

Qeyd etmək lazımdır ki, Rusiya əvvəllər də, Gürcüstanı, Türkiyəni və başqa qonşu ölkələrə öz bazarını bağlamaqla təzyiq göstərməyə çalışıb. 

Məsələ ilə bağlı Ermənistan Respublikasının baş nazirinin aparatının rəhbəri Araik Arutyunyan erməni biznesləri üçün xaricdə alternativ bazar potensialından danışmaqla məsələnin siyasi ola biləcəyinə eyham vurub. Parlamentin spikeri Alen Simonyan bağlanmanın arxasında siyasi səbəblərin ola biləcəyini desə də, tələsik nəticələrə gəlməmək lazım olduğunu vurğulayıb.

Bundan əlavə Ermənistanın ərazi idarəetmə və infrastrukturlar naziri Qnel Sanosyan bildirib ki, bəzi yük maşınlarının keçidi təmin olunsa da, bəzilərin keçidinə imkan verilməyib. Nazirlik əməkdaşları hazırda bu məsələni araşdırır.