Hollandiya hökuməti Aİ-nin miqrasiya qaydalarından imtina etmək istədiyi barədə Avropa Komissiyasını xəbərdar edib. Ölkə sığınacaq prosedurunun sərtləşdirilməsində israrlıdır.
Hollandiya hökuməti Avropa İttifaqının miqrasiya qaydalarına riayət etməkdən imtina etmək arzusunda olduğunu açıqlayıb. Bu barədə sığınacaq və miqrasiya naziri Marjolein Faber çərşənbə günü, sentyabrın 18-də sosial şəbəkədəki hesabında yazıb.
"Mən indicə Avropa Komissiyasına bildirmişəm ki, Hollandiya Avropanın immiqrasiya qaydalarından "imtina" etməsini istəyirəm. Biz öz sığınacaq siyasətimizə nəzarəti geri almalıyıq", - siyasətçi deyib.
Onun təklifini Hollandiyadakı ən böyük sağçı Azadlıq Partiyasının (PVV) lideri Geert Vilders dəstəkləyib. Milli parlamentdə çıxışı zamanı o, bu addımın çox vaxt aparacağını, lakin "bu, yeni küləyin əsdiyinə işarədir" dedi. O, həmçinin X hesabında yazdı ki, nazir Faber "tarix yazır və Hollandiyanın Avropa Komissiyasına miqrasiyanı dayandırmaq arzusunu bildirir".
Qeyd olunur ki, Hollandiyanın Aİ-nin miqrasiya sistemindən çıxarılması üçün onun 27 üzvünün hamısının razılığı tələb olunacaq.
Avropa İttifaqı genişmiqyaslı miqrasiya islahatını təsdiqlədi
2024-cü ilin may ayında Aİ ölkələri nəhayət, ittifaqın miqrasiya qanunvericiliyində geniş islahatları təsdiqlədilər. Qanunlar paketi, digər məsələlərlə yanaşı, xarici sərhədlərdə sığınacaq axtaran şəxslər üçün prosedurların sürətləndirilməsini nəzərdə tutur. Aİ-də qalma şansı az olanlar sərhəddə verilən qərarlarla daha tez deportasiya ediləcək.
İslahatın tərkib hissələrindən biri sığınacaq axtaranların Aİ ölkələri arasında bölüşdürülməsi üçün həmrəylik mexanizmidir. Bu o deməkdir ki, miqrantların Aİ-yə daxil olduğu ilk ölkələrdə - İtaliya, Yunanıstan, İspaniya, Kipr, Maltada sığınacaq axtaranların sayı həddindən artıq olarsa, digər Aİ ölkələri sığınacaq axtaranları kvota sistemi ilə qəbul etməyə məcbur olacaqlar. Əgər hər hansı ölkə qaçqınları qəbul etməkdən imtina edərsə, onlara maliyyə yardımı edə biləcəklər. Bundan əlavə, immiqrasiya axınının kəskin artması hallarında tədbir görülməsi proseduru tənzimlənib.
