Türkiyənin xarici işlər naziri Hakan Fidan amerikalı həmkarı Antoni Blinkenlə ilə Livandakı son prosesləri, habelə Qəzzanın şimalındakı humanitar vəziyyəti müzakirə edib.
Bu barədə “TRT Haber” məlumat yayıb.
Telekanalın məlumatına görə, Türkiyənin XİN başçısı “Qəzzanın şimalındakı humanitar vəziyyətin fəlakət miqyasına çatdığına diqqət çəkərək humanitar yardımların Qəzzaya aramsız şəkildə çatdırılmasının önəminə toxunub”.
“Görüşdə Livandakı son hadisələr də müzakirə edilib. Müharibənin bütün regiona yayılmasının qabaqlanması üçün bütün tərəflərin təmkinli davranmalı olduğunu vurğulayan nazir Fidan vaxt itirmədən Qəzzada atəşkəs elan edilməsi və İsrailin Livana qarşı hücumlarını dayandırması lazım olduğunu bir daha təkrarlayıb”, – “TRT Haber” qeyd edib.
Eyni zamanda, tərəflər Ukraynadakı son vəziyyət ətrafında da fikir mübadiləsi aparıblar.
ABŞ-nin dövlət katibi Antoni Blinken türkiyəli həmkarı Hakan Fidanla Cənubi Qafqazda sülhün bərqərar olunmasını haqqında da müzakirə aparıblar.
Bunu isə Dövlət Departamentinin mətbuat xidməti məlumat yayıb.
Bildirilib ki, Blinken telefon danışığında oktyabrın 23-də paytaxt Ankarada baş vermiş terror hücumu ilə əlaqədar Türkiyənin baş diplomatına başsağlığı verib.
“Onlar həmçinin artan qarşılıqlı əlaqələrin regionda hamı üçün faydalı olacağı ilə yanaşı Cənubi Qafqazda ədalətli və davamlı sülhün əldə edilməsinin vacibliyini müzakirə ediblər”, – xarici siyasət idarəsinin məlumatında diqqətə çatdırılıb.
