Cəlilabad rayonu ərazisində ağır cinayət törətməkdə təqsirli bilinən 1987-ci il təvəllüdlü Emin Quliyev və onun qardaşı, 1991-ci il təvəllüdlü Əziz Quliyevin cinayət işi üzrə məhkəmə prosesi başa çatıb.

Demokrat.az-ın əldə etdiyi məlumata görə, Lənkəran Ağır Cinayətlər Məhkəməsinin hökmü ilə təqsirləndirilən şəxslərin hər biri 11 il müddətinə azadlıqdan məhrum ediliblər.

İttihama görə, ötən il yanvarın 13-də Cəlilabadda şəhər sakini Rəcəb Mirzəyevin küt alətlə döyülmə xarakterli xəsarətlə xəstəxanaya gətirilməsi, həkimlərin səyinə baxmayaraq, orada ölməsi barədə məlumat daxil olub.

Məlumatla əlaqədar rayonun polis və prokurorluq orqanlarının əməkdaşları tərəfindən dərhal müvafiq tədbirlər həyata keçirilib.

Qətli törətməkdə şübhəli bilinən şəhər sakini Əziz Quliyev və onun qardaşı Emin Quliyev təxirəsalınmaz istintaq və əməliyyat-axtarış tədbirləri nəticəsində saxlanılıblar.

Qeyd edək ki, 1991-ci il təvəllüdlü Rəcəb Mirzəyev taksi fəaliyyəti ilə məşğul olub.

İstintaq orqanı tərəfindən onların barəsində Cinayət Məcəlləsinin 126.3-cü (qəsdən sağlamlığa ağır xəsarət yetirmə, ehtiyatsızlıqdan adam öldürmə) maddəsi ilə ittiham elan edilib.

Fariz Məlikli
Demokrat.az