AMEA-nın Məhəmməd Füzuli adına Əlyazmalar İnstitutunun akt zalında Özbəkistanlı şərqşünas, islamşünas alim, Amerikanın Hofstra Universitetinin professoru, tarix elmləri doktoru Elyor Kərimov “Özbək xanlıqlarında vəqfnamə, xan yarlıqları və qazı sənədləri” mövzusunda mühazirə oxuyub.

Alim auditoriyaya “XVII əsrin sonu-XX əsrin əvvəllərində Xirə xanlığının qazı sənədləri və xan yarlıqlarının qeydiyyatı” və “XVII-XIX əsr Kubraviya vəkfi: Orta Asiyada Kubraviya sufi təriqətinin tarixi üzrə yazılı mənbələr” adlı kitablardan hazırlanmış təqdimatını nümayiş etdirərək, çıxışında qazı sənədləri, sufi təriqətinin tarixini əks etdirən bir sıra yazılı mənbələri, o cümlədən xan yarlıqları və vəqfnamələr haqqında ətraflı məlumat verib. Mühazirə iştirakçıların marağına səbəb olub və onların mövzu ətrafında sualları cavablandırılıb. Professor E.Kərimov çıxışında iştirak edən hər kəsə təşəkkür edib və mühazirəni oxuması üçün yaradılan şəraitə görə AMEA-nın Məhəmməd Füzuli adına Əlyazmalar İnstitutunun rəhbərliyinə dərin minnətdarlığını bildirib. Sonda tədbir iştirakçıları ilə alimin xatirə şəkli çəkilib.

Qeyd edək ki, professor Elyor Kərimov UNESCO-nun Ümumdünya Yaddaş Reyestrinin Alt Komitəsinin və həmin təşkilatın təsis etdiyi “Sufizm, təsəvvüf və musiqi mədəniyyətinin “İnam” yolları” jurnalının üzvü, o cümlədən UNESCO tərəfindən nəşr olunmuş “Mərkəzi Asiya sivilizasiyalarının tarixi” çoxcildliyinin müəllifidir.