Elm və Təhsil Nazirliyi, Təhsil İnstitutu və Bakı Dövlət Universitetinin birgə təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş doktorantların və gənc tədqiqatçıların XXVI respublika elmi konfransı keçirilib.

Əvvəlcə Azərbaycanın ərazi bütövlüyü uğrunda həlak olan şəhidlərimizin əziz xatirəsi 1 dəqiqəlik sükutla yad olunub.

Azərbaycan Respublikasının Dövlət Himnindən sonra konfrans öz işinə başlayıb.

AR Elm və Təhsil Nazirliyinin Mikrobiologiya İnstitutunun baş direktoru, AMEA-nın müxbir üzvü Pənah Muradov və tədbirin “Təbiət elmləri” bölməsinin rəhbəri, Mikrobiologiya İnstitutunun Mikrobioloji biotexnologiya laboratoriyasının müdiri, b.e.d., prof. Könül Baxşəliyeva və institutun gənc tədqiqatçıları konfransın açılış mrasimində iştirak ediblər.

Açılışdan sonra konfrans bölmə iclaslarında gənc tədqiqatçıların çıxışları ilə öz işini davam etdirib.

Mikrobiologiya İnstitutunun əyani doktorantı, gənc tədqiqatçı Aqil Əhmədli “Mikromisetlərdən alınan lipolitik fermentlərin biodizel istehsalında istifadə imkanları” adlı məruzə ilə konfransda çıxış edib. Məruzə müasir dövr üçün son dərəcə aktual olan neftdən alınan dizelə alternativ olaraq qəbul edilən ekoloji təmiz yanacaq vasitəsi sayılan biodizelin istehsalına həsr olunub. Belə ki, elmi işin məqsədi bu prosesdə transestrifikator kimi istifadə olunan kimyəvi katalizatorların əvəzinə mikromiset mənşəli bioloji təmiz lipolitik fermentlərdən istifadənin üstünlüklərinin müəyyən edilməsidir.

Qeyd edək ki, konfransın keçirilməsində əsas məqsəd doktorantların və gənc tədqiqatçıların apardıqları elmi-tədqiqat işlərinin nəticələrinin müzakirəsini təşkil etmək, habelə onların elmi yaradıcılığını stimullaşdırmaqdır.

www.science.gov.az