Nobel mükafatı laureatı Əziz Səncərin AMEA-nın Fəxri üzvü seçilməsi haqqında vəsatət qaldırılıb
REGİONAL MƏTBUAT
15:03
21.11.2023
Baxılıb: 2509
Nobel mükafatı laureatı Əziz Səncərin AMEA-nın Fəxri üzvü seçilməsi haqqında vəsatət qaldırılıb

Noyabrın 20-də AMEA-nın Kimya Elmləri Bölməsinin ümumi iclası keçirilib.

Bölmənin sədri, AMEA-nın vitse-prezidenti, akademik Dilqəm Tağıyev iclası açaraq gündəlikdə duran məsələlərlə iclas iştirakçılarını tanış edib.

 

Bölmə üzvlərinin nəzərinə çatdırılıb ki, 2015-ci ildə Kimya üzrə Nobel mükafatına layiq görülmüş Şimali Karolina Universitetinin professoru Əziz Səncər nüklein turşularının (DNT) təmiri (reparasiya) sahəsində çox qiymətli tədqiqat işlərinin müəllifi kimi elmi ictimaiyyətə yaxşı tanışdır. Nobel komitəsinin fikrinə görə, DNT-nin hüceyrədə normal replikasiyası zamanı və ya müxtəlif fiziki və kimyəvi amillərin təsiri nəticəsində baş verən zədələnmələrin axtarılması və aradan qaldırılmasına yönələn tədqiqatların əhəmiyyəti çox böyükdür. Bu sahədə mövcud olan mexanizmlərin və sistemlərin pozulması bir çox ağır irsi xəstəliklərin yaranmasına səbəb olur və ümumiyyətlə, belə təmir mexanizmləri olmadan çətin ki, həyatın mürəkkəb formaları mümkün olardı.

 

Qeyd olunub ki, Azərbaycanı özünün vətəni bildiyi professor ƏzizSəncər dəfələrlə ölkəmizdə keçirilən müxtəlif tədbirlərdə iştirak etmişdir. Onun həyat hekayəsi ətraflı şəkildə Orxan Bursalının “Əziz Səncər və Nobel hekayəsi” (2016) kitabında təsvir olunmuşdur: “Bütün bunları nəzərə alaraq, professor Əziz Səncəri AMEA-nın Fəxri üzvü seçmək haqqında niyyətimiz ona bildirilmişdir. Əziz Səncər 25 oktyabr 2023-cü ildə AMEA-nın prezidenti, akademik İsa Həbibbəyliyə ünvanladığı məktubda öz minnətdarlığını bildirərək AMEA-nın Fəxri üzvü seçilməsinə razılığını ifadə etmişdir”.

 

Azərbaycan Respublikası Prezidentinin 2023-cü il 3 noyabr tarixli Fərmanı ilə təsdiq edilmiş Azərbaycan Milli Elmlər Akademiyasının Nizamnaməsinin 5.6; 5.9; 5.15; 5.16 və 10.10 bölmələrini əsas götürərək Kimya Elmləri Bölməsinin ümumi iclasında AMEA-nın həqiqi üzvləri açıq səsvermə yolu ilə yekdilliklə professor Əziz Səncərin AMEA-nın Fəxri üzvü seçilməsini AMEA-nın Ümumi yığıncağına tövsiyə ediblər.

 

Ümumi iclasda Kimya Elmləri Bölməsinin institutların illik hesabatına həsr olunacaq iclasın keçirilmə tarixi, hesabatların hazırlanması və təqdimatı ilə əlaqədar bir sıra məsələlər də müzakirə edilib.

 

 www.science.gov.az

Digər xəbərlər