Hollandiya Almaniyanı Reyn çayına PFAS kimyəvi tullantılarını dayandırmağa çağırıb. Bildirilib ki, bu çirklənmə suyun keyfiyyətinə və içməli su ehtiyatlarına təhlükə yaradır.

Hollandiyadakı içməli su şirkətləri Almaniyanın Ətraf Mühit naziri Steffi Lemkeyə məktub yazaraq, zəhərli PFAS kimyəvi maddələrinin Reyn çayına axıdılmasına məhdudiyyət qoyulmasını tələb ediblər. Reyn çayı Hollandiyada bir çox ev təsərrüfatları üçün vacib şirin su mənbəyi kimi seçilir.

Hollandiya İçməli Su Şirkətləri Assosiasiyası (RIWA) vəziyyəti tənqid edərək, "Niderlandda önümüzdəki illərdə təmiz içməli suya tələbat artacaq, lakin Almaniyada sənaye tullantıları səbəbindən bu suyun təmin edilməsi getdikcə bahalaşır" dedi.

RIWA Almaniyanın Reyn çayına atdığı kimyəvi tullantıların həm milli, həm də Avropa suyun keyfiyyət standartlarını pozduğunu iddia edib. Razılaşmaların lazımi səviyyədə yerinə yetirilmədiyini vurğulayan RIWA, bəzi bölgələrdə razılaşdırılmış miqdarda PFAS kimyəvi maddələrinin çaya 10 dəfə atıldığını və suyun tərkibində PFAS-ın təhlükəsiz həddən 3-4 dəfə artıq olduğunu bildirib.

PFAS təxminən 4000 bioparçalanmayan kimyəvi maddəni əhatə edən bir termindir və tez-tez yapışmayan tavalarda və suya davamlı yağış paltarlarında istifadə olunur. PFAS çirklənməsi Hollandiyada ciddi problemə çevrilib. İyul ayında səlahiyyətlilər, dəniz köpüyündə yüksək miqdarda PFAS olduğuna görə uşaqların çimərliklərdə oynamaması barədə xəbərdarlıq etdi.

Avropa Pestisidlərlə Fəaliyyət Şəbəkəsinin araşdırmasına görə, Hollandiya və Belçikada meyvə və tərəvəzlərin 27 faizində PFAS pestisidləri aşkar edilib. Bundan başqa, ölkədə hobbi məqsədilə yetişdirilən toyuqların yumurtalarında da bu kimyəvi maddə aşkar edilib.