“Fokus”: Ukraynadakı münaqişəyə son qoymaq üçün Tramp neftin qiymətini azaltmaq istəyir

Donald Tramp bir daha deyib ki, o, rəsmi vəzifəyə başlamazdan əvvəl də Ukraynadakı münaqişəyə son qoya bilər, Focus yazır. Nəhayət, sülhə necə nail olacağına dair planını açıqladı. Tramp enerji qiymətlərini əhəmiyyətli dərəcədə azaltmaq niyyətindədir.

Respublikaçılar Partiyasından ABŞ prezidentliyinə namizəd Donald Tramp yenidən Ukraynadakı münaqişəyə son qoya biləcəyini bildirib. Siyasətçi hesab edir ki, enerji qiymətlərinin əhəmiyyətli dərəcədə azalması Kremlin rəhbəri Vladimir Putini dayandıra bilər.

ABŞ prezident seçkilərində qalib gəlsə, Donald Tramp yeni ildən əvvəl, hətta rəsmən vəzifəyə başlamazdan əvvəl Ukraynadakı münaqişəyə son qoyacaq. Siyasətçi bunu Nyu-York İqtisadi Klubunda bəyan edib.

Tramp deyib: "0Əgər0 qalib gəlsək, inanıram ki, mən hələ rəsmi olaraq vəzifəyə başlamazdan əvvəl seçilmiş prezident kimi bu münaqişəni həll edə bilərəm. Mən bu münaqişəni dayandıra bilərəm, çünki bu, dəhşətli, dəhşətli münaqişədir. Ukraynada siz təsəvvür etdiyinizdən də çox insan öldürülür ."  

Siyasətçi bildirib ki, onun planı vəzifəyə gəldikdən sonra 12 ay ərzində enerji qiymətlərini yarı və ya daha çox azaltmaqdır.

"Neft 40 dollar olanda Putin mübarizə apara bilməz" dedi Tramp.

Qeyd edək ki, hazırda Rusiyanın “Urals” markalı xam neftinin bir barelinin qiyməti təxminən 70 dollardır.

ABŞ-da prezident seçkiləri noyabrın 5-də keçiriləcək. Reqlamentə əsasən, Ağ Ev rəhbərinin andiçmə mərasimi yanvarın 20-də baş tutacaq.

Xatırladaq ki, iyunun 16-da Donald Tramp ABŞ-ın Ukraynaya yardımının həcmini tənqid edib və Vladimir Zelenskini “bütün siyasətçilər arasında ən yaxşı satıcı” adlandırıb.

İyunun 18-də respublikaçı senator Coni Ernst bildirib ki, Tramp şəxsi söhbətlərində Vaşinqtonun Kiyevə hərbi yardım ayırmasını faktiki olaraq dəstəkləyir.