Londonda ictimai nəqliyyat sisteminə kiberhücum edilib və 5 min insanın şəxsi məlumatları risk altında olub. Hücuma görə 17 yaşlı gənc həbs edilib.

İngiltərənin paytaxtı Londonda ictimai nəqliyyat sisteminə kiberhücum olub. Milli Cinayət Agentliyi (NCA) sentyabrın 5-də baş vermiş hücumla bağlı 17 yaşlı yeniyetmənin həbs edildiyini açıqlayıb. Bildirilib ki, London Nəqliyyat Sistemində (TfL) qeydiyyatda olan təxminən 5 min nəfərin şəxsi məlumatları, o cümlədən bank məlumatları oğurlanmış ola bilər.

NCA və Milli Kibertəhlükəsizlik Mərkəzi (NCSC) hadisə ilə bağlı genişmiqyaslı araşdırmaya başlasa da, London Nəqliyyat Sistemi hücumdan təsirlənən müştərilərlə birbaşa əlaqə saxlayacağını bildirdi. Səlahiyyətlilər müştərilərə şübhəli e-poçt və mesajlardan ehtiyatlı olmaları barədə xəbərdarlıq edib.